Өңір тұрғындарын табиғи газбен қамтамасыз ету жұмыстары кезең-кезеңімен жүргізіліп келеді. Бір жылда 62 газбен қамту нысанының құрылысы аяқталып, газбен қамтылған елді мекендер саны 513-ке жетті. Облыстың стратегиялық даму жоспарына сәйкес және газ ресурсының мүмкіндігін ескере отырып, 2030 жылға дейін облыстың елді мекендерін 100 пайыз газбен қамтамасыз ету күтілуде.
Тұрғындарды газбен қамту жұмыстарының барысы облыс әкімі Дархан Сатыбалдының төрағалығымен өткен жиында қаралды. Өңір басшысы бұл бағыттағы жұмыстарды күшейтуді тапсырды. Салаға жауапты басшыларға ауылдарға жеткізілген газды әр үйге қосуды қолға алуды қатаң ескертті.
Былтыр облыстық бюджеттен 7 млрд теңге қаржы бөлінген. Жалпы 17,5 млрд теңге қарастырылған. 2023 жылы 27 жоба іске асырылып, 27 елді мекен газбен қамтылған. 47 нысанның құрылысы 2024 жылға өтеді.
Биыл газдандыру жұмыстарына 10,1 млрд теңге қаржы бөлінген. 71 нысанның құрылысы жүргізіледі. Жыл соңына дейін 38-і пайдалануға берілсе, 33 нысан 2025 жылға өтпелі. Құрылысы аяқталғанымен, газға қосылмаған нысандар да бар.
Сонымен қатар жиын барысында жобалардың мезгілінде және сапалы іске асырылуына жауапкершілікті күшейту, жобалық-сметалық құжаттама әзірлеу деңгейін жылдамдату, құрылыс монтаж жұмыстарының сапасына бақылауды күшейту және жұмыстарды жоспарлы түрде жалғастыру жайы талқыланды.
